ლატვიის სეიმმა ქვეყნის „სტამბოლის კონვენციიდან“ გასვლას მხარი დაუჭირა

ლატვიის სეიმმა დაამტკიცა კანონპროექტი, რომელიც ქალთა მიმართ ძალადობისა და ოჯახში ძალადობის პრევენციისა და მასთან ბრძოლის შესახებ ევროპის საბჭოს კონვენციიდან, „სტამბოლის კონვენციიდან“ გასვლას ითვალისწინებს.

მედიის ინფორმაციით, ლატვიის პარლამენტში დებატები 12 საათს გაგრძელდა. კანონპროექტს 100-წევრიან პარლამენტში მხარი დაუჭირა 56-მა დეპუტატმა, წინააღმდეგი იყო 32-მა, ხოლო ორმა თავი შეიკავა.

ლატვიის პრეზიდენტმა ედგარს რინკევიჩმა კანონპროექტს ხელი ათი დღის ვადაში უნდა მოაწეროს ან ხელახლა განსახილველად სეიმს დაუბრუნოს.

კონვენციას პირველად ხელი მოეწერა სტამბოლში 2011 წელს და ძალაში შევიდა სამი წლის შემდეგ. ევროკავშირის ქვეყნების უმეტესობამ დოკუმებტს ხელი მოაწერა და მისი რატიფიცირება მოახდინა.

ლატვია მეორე ქვეყანა იქნება, თურქეთის შემდეგ, რომელიც კონვენციას დატოვებს.