ნავთობი, ჩინეთი და დოლარის კურსი

იუანის და ჩინური საფონდო ბაზრის ძლიერი ვარდნის შემდეგ, ამ კვირაში ორივეს სტაბილურობა დაეტყო, თუმცა საერთაშორისო ბაზრები მაინც სიფრთხილეს იჩენენ, რადგან ცისქვეშეთიდან ცუდ სიურპრიზებს კვლავაც არავინ გამორიცხავს. რისკებისადმი აპეტიტის კლებას, საფონდო ბაზრების დამშვიდება მოჰყვა, რასაც ვერ ვიტყვით ნავთობზე, რომლის მარკა ბრენტის ფასი ფსიქოლოგიურ დონეს – ბარელში 30 დოლარს უახლოვდება.

ბრენტის ფასი უკვე ზედიზედ მეშვიდე სავაჭრო სესიაა, რაც კლებულობს (ამ მონაკვეთში მან ფასის დაახლოებით 20% დაკარგა). ეს კი იმას ნიშნავს, რომ პაუზაა მოსალოდნელი, რაც ალბათ სწორედ 30-დოლარიან ნიშნულთან მოხდება, სადაც ბაზრის მოვაჭრეები მოგებას დააფიქსირებენ და პოზიციების გახსნისთვის მორიგ ხელსაყრელ მომენტს დაელოდებიან.

ტრადიციულად, კვირის დასაწყისი სავალუტო ბაზარზე სიმშვიდით გამოირჩევა და ამ მხრივ, გამონაკლისი არც ამ კვირაში ყოფილა. ამას კი ხელი უქმეებზე გამოქვეყნებულმა ჩინურმა სტატისტიკამაც შეუწყო, რომლებიც ერთმნიშვნელოვანი არ იყო, თუმცა არც პანიკის საფუძველი შეუქმნია. მართალია, დეკემბერში ჩინეთში ინფლაციის დონე 0.5%-ით გაიზარდა, რაც პროგნოზზე მეტია, მაგრამ საერთო ჯამში, სამომხმარებლო ფასების წლიური ინდექსის მიზნობრივი მაჩვენებელი ვერ შესრულდა და სამომხმარებლო აქტივობა კვლავაც შემცირებულია.

ეს კი შენელებული მოქმედების ნაღმია მთელი მსოფლიოს ფინანსური ბაზრისთვის – თუ ცისქვეშეთის ინფლაცია კვლავ დაბალ დონეებზე შენარჩუნდება, ეს მალე უარყოფითად აისახება ქვეყნის გლობალურ მშპ-ს მაჩვენებელზე. სიტუაციის გამოსწორება, ექსპორტის გაზრდას შეუძლია, მაგრამ ეს ნაკლებად მოსალოდნელია, რადგან განვითარებადი და განვითარებული ქვეყნების ბაზრებზეც, სამომხმარებლო აქტივობის შენელება ერთ-ერთი მთავარი პრობლემაა, რაც ჩინურ ექსპორტს პირდაპირ ურტყამს. როგორც ჩანს, ჩინელებს გამოსავლის სახით, ეკონომიკის სტიმულირება დარჩათ, რასაც ასევე შეუძლია ბაზრებზე არასტაბილურობის გამოწვევა.

ამ სიტუაციაში, ბაზრებზე რისკის აპეტიტი კლებულობს და შესაბამისად, ბიზნესი თავშესაფარს უსაფრთხო ვალუტებში ეძებს, როგორებიცაა დოლარი და იენი. ამას ემტება ევროპული უღიმღამო სტატისტიკა და ის ფაქტი, რომ დეკემბერში ამერიკაში ძლიერ გაიზარდა არასასოფლოსამეურნეო სახელფასო უწყისების (NFP) რაოდენობა. ეს კი ნიშნავს, რომ შტატების დასაქმების ბაზარი კვლავ უმჯობესდება, რაც ადრე თუ გვიან, სამომხმარებლო ბაზარსაც გამოაცოცხლებს და ეს ინფლაციას მიზნობრივი 2%-ისკენ ასწევს. შესაბამისად, ფედრეზერვს უფრო მეტი საბაბი ექნება იმისათვის, რომ დოლარზე განაკვეთი მორიგი 0.25%-იანი პორციით ასწიოს. ამერიკული ეკონომიკის თავდაჯერებული ზრდა კი, სავალუტო ბაზარზე დოლარის პოზიციების გამყარების საწინდარია.