აშშ-ში ინსაიდერული ინფორმაციის მოპარვაში რუსი და უკრაინელი ჰაკერები არიან ეჭვმიტანილი

Wall Street-დან ინსაიდერული ინფორმაციის მოპარვის საქმეზე დაკავებულია ჰეჯფონდის ხელმძღვანელი ვიტალი კორჩევსკი, რომელიც 1995 წელს რუსეთიდან არის ემიგრირებული.

პოლიციის ინფორმაციით, სწორედ მან გაუკეთა ორგანიზება დანაშაულებრივ სქემას და შუამავლის როლში გამოვიდა რუს და უკრაინელ ჰაკერებს შორის, რომლებიც ინსაიდერულ ინფორმაციას იპარავდნენ მსხვილი ამერიკული კომპანიების კომპიუტერული სისტემებიდან. ამ ინფორმაციის მყიდველი აშშ-ის საფინანსო წრეები იყო და მათი გამოყენება ხდებოდა Boeing Co.-ს, Oracle Corp.-ის, Hewlett-Packard Co.-ს და სხვა კომპანიების აქციებით ვაჭრობის ოპერაციებისთვის.

სამართალდამცავებმა დაადგინეს, რომ კონფიდენციალური ინფორმაციის რეალიზაციით, ბრალდებულებმა $30 მლნ გამოიმუშავეს.